Iberiar penintsulako aztarnategietan, dinosauroen eskeleto-hondar artikulatuez, oinatzez eta habiez -arrautza eta guzti- osatutako fosil ugari aurkitu izan da.

Goi Jurasikoko dinosauro adierazgarrienak Allosaurus teropodoa, Lourinhasaurus sauropodoa eta Dacentrurus estegosauroa dira.

Behe Kretazeoko dinosauro ugarienak, berriz, iguanodontidoak (Iguanodon-a) eta bi hankako korrikalari txikiak diren hipsilofodontidoak dira. Aragosaurus sauropodoa eta Pelecanimimus teropodoa Iberiar penintsulak bere-bereak dituen formak dira.

Kretazeoaren amaieran, sauropodo titanosauroak (Lirainosaurus-a) eta hadrosauroak(Pararhabdodon-a) dira adierazgarrienak. Ankilosauroek, teropodoek eta ornitopodo primitiboek (Rhabdodon-ak) osatzen dituzte garai hartako faunak.