Energia Berriztagarrien Ingeniaritzako Gradua
Gizarteak ingurumenarekiko duen gero eta sentsibilizazio handiagoarekin bateragarria den energia-eskaera handiagoak sortzen duen desafioari aurre egiteko, prestakuntza zientifiko eta tekniko sendoa eta energiaren esparru desberdinetan ezagutza espezializatuak dituzten titulatuak behar dira, energia-sektorearen egungo eta etorkizuneko egiturarako baliabide erabilgarrien erabilera arrazionala kudeatzeko eta, aldi berean, ingurumenaren gaineko inpaktua minimizatzeko gai direnak. Ingeniaritza elektriko, elektroniko, mekaniko eta kimikoko eta energia berriztagarrien teknologia espezifikoetako ezagutzak dituen diziplina anitzeko ingeniari-mota berri bat.
Beraz, Energia Berriztagarrien Ingeniaritzako Gradua sektoreko espezialisten gero eta eskaera handiagoak justifikatzen du. Eskaera horrek, gainera, garrantzi handiagoa hartuko du datozen urteetan, izan ere, orain garrantzia handiena duten energiaren sorkuntza-, garraio- eta banaketa-esparruetatik beste sektore batzuetara hedatuko da, besteak beste, garraio-sektorera, eraikuntza-sektorera edo industria-sektorera, oro har, energiaren erabilera arrazionalak sektore guztietan izango duen gero eta garrantzi handiagoagatik. Geroko titulatuek gaur egun oso interesgarriak eta garrantzitsuak diren arazo tekniko eta ingeniaritzakoei aurre egin beharko diete, esaterako, ibilgailu elektrikoari, zentral termoelektrikoei, itsasoko olatuetatik energia ateratzeari, etab.
Gradu edo titulazio baliokide hori oso unibertsitate gutxitan ematen da mundu osoan eta orain dela oso denbora gutxi hasita. Horrela, gure Ikasketa Plana Oregonen 2005az geroztik ematen den eta AEBetan gisa horretako aurrenetakoa izan den antzeko gradu batean dago oinarrituta.
Proposatutako programak energia berriztagarriko iturrietan, elektrizitate-sorkuntzan eta Sarera konektatzeko egokitzapenean, energiaren banaketan eta biltegiratzean, aurrezteko neurrietan eta energiaren erabilera efizientean zentratutako prestakuntza osoa eskaintzen die ikasleei.
Proposamena hiru modulutan egituratuta dago: oinarrizko prestakuntza, industria adarraren prestakuntza komuna eta prestakuntza espezifikoa.
Ikasleek oinarrizko gaien ezagutza sendoak jasotzea da xedea: Matematika,
Fisika, Kimika, Adierazpen Grafikoa, Informatika eta Enpresa; irakasgai horiek, aldi berean, industria-adarraren irakasgai komunen oinarritzat balioko dute: Zirkuitu elektrikoak, Makina elektrikoak, Elektronika, Termodinamika,
Bero-transferentzia eta Mekanika; horiekin, energia berriztagarrien inguruko irakasgai espezifikoetarako prestatuko dituzte.
Proposamen horrekin, titulatuek, energia berriztagarrien sektorean eskumenak dituzten edo jarduerak garatzen dituzten administrazio eta enpresetako postu teknikoetan erantzukizunei eta zereginei aurre egiteko ezagutza-maila lortu ahal izango dutela uste da.
Prestakuntza-profilak ezagutza teorikoak eta trebetasun praktikoak uztartzen ditu profesional moldakorrak eta honako hauek egiteko gai direnak prestatzeko helburuarekin:
- Energia Berriztagarrien esparruan proiektuak garatzeko.
- Instalazioak energia aprobetxatzeko optimizatu eta kudeatzeko.
- Baliabide energetikoen potentziala ebaluatzeko.
- Sistema elektriko eta elektroniko isolatuak garatzeko eta Sarera konektatzeko.
- Energia Berriztagarrietarako teknologien ezarpenean ingurumen-inpaktua aztertzeko.
- Energia Berriztagarrien arlo desberdinetan ikerketa-proiektuetan parte hartzeko.